مشاهدة النسخة كاملة : الثوره لسه مانتهتشى


ملك مصر
05-03-2011, 11:40 AM
عدو الثورة الأول


"انزلوا دافعوا عن بيوتكوووواااا"
"صبر الجيش له حدود"
"اقتصادنا عمال يتنيّل .. كفاية كده"
"اتحققت أغلب المطالب .. محدش بياخد كل حاجة"
"حلقة الجيش طمنتني قوي.. حلقة أحمد شفيق طمنتني قوي.."

الحقيقة إن علماء السياسة بيعرّفوا الثورة أنها الإنتقال الشامل و التام من وضع راهن إلي وضع آخر سواء كان كويس أو وحش.. بيسمّوا أي انقلاب تام وتغير شامل في نظام الدولة ثورة.. سواء التغيّر ده عن طريق انتفاضة شعبية أو انقلاب عسكري أو حتي انتخابات من اللي بتقلب الترابيزة (زي فوز حماس في 2005 مثلا.. ممكن تعتبر ثورة بالمعني ده)..
وطبيعة التغيير ده إنه لازم يبقي تغيير (جذري).. مش مجرد تغيير في الوجوه الحاكمة أو السياسات.. إنما تغير في النظام السياسي ككل
الكلام المجعلص ده قالهولي دكتور في العلوم السياسية بيدرّس في أمريكا.. يعني راجل برنس..

التغيير الجذري ده عشان يحصل .. لازم يتعامل مع أوضاع قائمة ويقلبها رأسا علي عقب.. والأوضاع دي بيكون حواليها مستفيدين و منتفعين و قوي و دبابير و نسور.. والواقع والتاريخ بيقول ان قوة الشعب ممكن تقضي علي دول كلهم.. ممكن تقضي علي كل
أعداء الثورة إلا عدو واحد.. لأنه بيفرمل الثورة من الأعماق.. من الداخل..

العدو
ده
هو:
الخوف..

فيه واحد سياسي أمريكي اسمه تيودور هوايت كتب كتاب اسمه (البحث عن التاريخ) بيحلل فيه تاريخ أربعين سنة من أمريكا.. وبيطرح تساؤل: ايه اللي خلّي بلد زي أمريكا تقوم بحرب مجنونة ضد بلد صغيره زي فيبتنام.. لمدة عشر سنين.. تخسر فيها نص مليون بني آدم.. وتخسر سمعتها وحلفائها.. بيقول ان السبب الأساسي هو راجل سياسي أمريكي اسمه جوزيف مكارثي عمل حمله رهيبة بيخوف الأمريكان من أخطبوط اسمه الشيوعية..
وبيستنتج الكاتب نتيجة حزينة .. بس صادقه: الخوف يحرّك أحداث التاريخ أكثر مما يحرّكها الأمل..

فكّر بنفس الطريقة في اللي خلي بلد زي أمريكا تدخل في حروب غير منطقية مع أفغانستان والعراق.. هتلاقيها حملة منظمة لإرعاب الأمريكان من أخطبوط تاني اسمه (الإرهاب) أو (التطرف الإسلامي)
دماء بتسيل.. مدن بتدمر.. أطفال بتتيتم.. تاريخ بيتغير.. وكل الأحداث دي بتعدّي من فوق جسر اسمه الخوف..

حاول تقرأ الثورة المصرية من البُعد ده؟
بص كده علي الأحداث..

إيه اللي كان بيحرّك مبارك في التمسّك بالكرسي أيام الثورة الأولي؟ الخوف من مستقبل مجهول مظلم كئيب بعد ما تتشال منه كل ألقابه وتنهار كل حصونه.. مستقبل ممكن يبقي في سجن القضاء.. أو في سجن أصعب منه اسمه الإهمال والتهميش ..

إيه كانت خطة الأمن المصري القذرة لإيقاف الثورة؟ تخويف الناس.. ارعابهم.. تحسيسهم ان فيه بلطجية تحت البيت هيقتلوك ويغتصبوا مراتك ويخطفوا عيالك.. وكل ده حصل لنا من ورا بتوع التحرير...

إيه اللي كان بيحرك التعليقات الهدّامة بتاعة حزب الكنبة (وده حزب الأغلبية في مصر.. اللي بيتفرجوا علي التلفيزيون وهما قاعدين علي الكنبة و بيقولوا أي كلام)؟ الخوف علي شيء هُلامي اسمه الإستقرار.. الخوف من احنا منلاقيش ناكل.. الخوف ان مدارس العيال تتأخر شهرين وميتعلموش كويس..

إيه اللي حرك الناس بسرعة فظيعة ان هما يصنعوا إله من المجلس الأعلي للقوات المسلحة (مع كامل تقديرنا لدور جيش مصر العظيم اللي لولاه الثوره مش هتنجح)؟ الناس عايزه تحس ان ليها كبير تستخبي وراه.. ليها أب وأم ومرضعة.. مش قادرة تقف لوحدها في قلب الميدان صدرها مفتوح تواجه الظلم لوحدها

لكن..
الشباب اللي قاموا ووقفوا وقفة رجالة في التحرير هما اللي قدروا يتغلبوا علي خوفهم.. هما اللي قدروا يسقطوا النظام من قلوبهم ونفوسهم.. قبل ما يسقطوه من الواقع.. هما اللي اتحققت فيهم كلمة الشاعر العظيم تميم البرغوتي لما بيقول:

يا أمتي لا تفزعي من سطوة السلطان..
أية سطوة؟
ما شأت ولّي واعزلي
لا يوجد السلطان إلا في خيالك..

كل الناس اللي عملت انجازات عظيمة في حياتها وفي التاريخ هي الناس اللي قدرت تتغلب علي خوفها..

أهل فيتنام اللي قدروا بأقل أسلحة ينتصروا علي أمريكا أعتي قوة علي وجه الأرض..
عمر المختار اللي حارب الفاشية الإيطالية وهو عمره تلاتة وسبعين سنة ولما جم يعدموه وقف علي منصة الإعدام وهو خطواته ثابتة وبيضحك وبيقول: (إن حياتي ستكون أطول من حياة شانقي.. نحن لا نستسلم.. ننتصر.. أو نموت)..
فارس عوده.. الطفل الفلسطيني المشهور اللي وقف يرمي طوب علي الدبابة.. اتفرجوا علي الفيديو بتاعه وشوفوا قد ايه ممكن
الإنسان يتغلب علي خوفه (روحوا عاليويتيوب واكتبوا: فارس عوده.. واتفرجوا)

الشباب اللي طلعوا وهما عشرين واحد علي بلطجية يوم الأربع في التحرير فوق الكوبري وخلوهم يجروا قدامهم..

أصحاب الرسول اللي كانوا طول حياتهم ثوار ضد الظلم والإستعباد والكفر والطغيان.. بص علي الآية اللي بتقول: ((الَّذِينَ قَالَ لَهُمُ النَّاسُ إِنَّ النَّاسَ قَدْ جَمَعُواْ لَكُمْ.. فَاخْشَوْهُمْ.. فَزَادَهُمْ إِيمَاناً .. وَقَالُواْ حَسْبُنَا اللّهُ وَنِعْمَ الْوَكِيلُ)) وشوفوا كلمة (فاخشوهم) قد ايه مخيفة .. وشوفوا قدامها كلمة (فزادهم إيمانا) قد ايه قوية و صلبة.. وشوفوا لما قالوا (حسبنا الله).. يعني اعتمادنا علي اللي خالقنا بس.. مش علي أي حاجة تانية في الدنيا.. (ونعم الوكيل) لأنه أقوي من كل قوي الشر الضعيفة العاجزة اللي في الدنيا.. شوفوا بقي الآية اللي بعدها: ((فَانقَلَبُواْ بِنِعْمَةٍ مِّنَ اللّهِ وَفَضْلٍ.. لَّمْ يَمْسَسْهُمْ سُوءٌ))

يا جماعة الثورة مخلصتش.. كل اللي استشهدوا واتضربوا واتبهدلوا في التحرير معملوش كده عشان حسني مبارك يعزّل من قصره في القاهرة ويروح قصره في شرم الشيخ مع بقاء رئيس حكومته و وزير داخليته وخارجيته وعدله ورئيس وزراءه.. وأجهزة أمنه (إرهابه) بالكامل.. وأجهزة إعلامه (تضليله) بالكامل..

ثورة فرنسا قعدت 8 سنين.. والناس اضربت واتقتلت لحد ما حققت حريتها.. يا ريت لما نروح نتفسح في الشانزليزيه نبقي نفتكر ناس قد ايه ضحت عشان تعمل من بلدها حاجة..

ثورة 25 يناير دي حرب بين الخوف والإرهاب من ناحية... والأمل و العزيمة من ناحية.. والكلمة في الآخر لشعب مصر..

“Courage is holding your fear one minute more”
"الشجاعة هي أن تتحمل خوفك دقيقة أخري"

المهندس
06-03-2011, 09:34 AM
فقط للاعضاء المسجلين يمكنهم رؤية الروابط

محمد العبيدي
03-04-2012, 08:52 PM
فقط للاعضاء المسجلين يمكنهم رؤية الروابط